«Қызылжар» арулары елордада сенімді жеңіске жетіп, плей-офф жолындағы күресті жалғастыруда!

Кеше Әйелдер арасындағы Қазақстан чемпионатының 13-туры аясында біздің команда елордада «Астана» клубымен қонақта кездесті.
Командамыздың бастапқы құрамы:
Ирина Кондрашова – Әсел Куртанова (К) – Жібек Жақсыбай – Нұрсая Сұлтан – Шахноза Холбаева – Шахзода Холбаева – Әсел Жолболат – Жансезім Айсапар – Асалхон Аминжонова – Аяжан Абдина – Варвара Ковалева.
Ойынның алғашқы минуттары тартысты әрі жүйкеге салмақ түсіретіндей басталды: екі команда да барынша сақ ойнауға тырысты. Дегенмен, бірінші таймда Әсел Жолболат айып соққысын шебер орындап, есеп ашты! Үзіліске командалар біздің қыздардың басымдығымен (0:1) кетті.
Екінші таймның басында капитан Әсел Куртанованың тамаша асыра теуіп берген пасынан кейін Жансезім Айсапар есепті еселеді. Арада бірнеше минут өткенде, алаңға қосалқы құрамнан қосылған Сабрина Нұржігітова жеке шеберлігімен алға ұмтылып, пасын берді – оны Асалхон Аминжонова мүлт жібермей, есепті іріге айналдырды (0:3).
Бұдан кейін Сабрина матчындағы екінші нәтижелі пасын (ассист) тіркеп, Жансезім Айсапар дубль авторы атанды – 0:4! Көп ұзамай алаңға қосалқы құрамнан шыққан Анель Бланк айып соққысынан қуатты соққы жасап, бесінші голды соқты. Ал ойынның нүктесін пенальтиді дәл орындаған Варвара Ковалева қойды.

Осы тамаша жеңістен кейін командамыз турнир кестесінде өз позициясын сақтап қалды. Енді біздің қыздарды келесі маңызды кездесу күтіп тұр: 4 тамыз күні өз алаңымызда турнир кестесінің көшбасшыларының бірі — елордалық «Жеңіс» командасын қабылдаймыз.